என் உயிரே

 அடுத்தவரின் கவிதைகளை

ரசிக்க மட்டும் தெரிந்த என்னை

கவிதை எழுத வைத்தவனே

அழகிய கவிதையெனத் தோன்றுகிறாய்

ஒவ்வொரு வரியாக எழுதுகிறேன்

முடிய மறுக்கிறது கவிதை 

முதல் பார்வையில் உணரவில்லை

நம் ஜென்ம பந்தத்தை

என் தோழியுடன் பேசிக் கொண்டிருந்தபோது 

என்னைக் கடந்து செல்கையில்

ஏதோ கூறிவிட்டுச் சென்றாயே

நினைவிருக்கிறதா

திகைத்து உன்னை நோக்கிய போது

சிறு புன்னகையுடன் நகர்ந்து சென்றாயே

 அந்த முதல் சந்திப்பு

என் மனதில் இன்னும் பசுமையாய்

அலைபாயும் என் உணர்வுகளுக்கு உரியவனே

நீ அறியாய்

உன் பெயரைத் தவிர

மற்றைய எழுத்துக்கள் என் பேனாவால்

பெரும்பாலும் தவறாகவே எழுதப்படுகின்றன

உன்னை மட்டும் சந்தித்திராவிட்டல்

காதலின் சுவை என்னவென்று அறியாமலே

என் ஆயுள் முடிந்திருக்கும்

விழுதுகள் போல உறவுகள் 

ஓராயிரம் வந்துமென்ன

என் வேரென நீயிருந்தாய்

அதனால் நான் சாய்ந்து விடாதிருந்தேன்

நினைக்க நினைத்தால்

பக்கமாய் இருப்பவர்களை எல்லாம் விட்டுவிட்டு 

தொலைவில் இருக்கும் உன்னை மட்டும்

         முழுமையாக்கி மகிழ்கிறது என் இதயம்.

Read More

தேனின் மகிமை .

                   தேன் இயற்கை தரும் இனிய சத்துணவு.நீண்ட ஆயுளுடன் நல்ல உடல் நலம் பொருந்தி நோயின்றி வாழ விரும்புபவர்கள் பயன்படுத்துவதற்கு தேன் ஒரு சிறந்த அற்புத மருந்தாகும்.தேனை யார் ஒருவர் தொடர்ந்து சாப்பிடுகிறாரோ அவர் நோயின்றி நீண்ட ஆயுளுடன் வாழ முடியும்.கண்பார்வை அற்றவர்கள் தொடர்ந்து தேனை உட்கொள்வதனால்  அவர்களது பார்வைக் கோளாறுகள் நீங்குகிறது என்பதை தேனைத் தொடர்ந்து அருந்துவதால்தான் உணர முடியும்.ஆயிரம் ஆண்டுகளாகியும் தேன் கெடுவதில்லை.சில நோய்களுக்கு தேனில் மருந்தை சேர்த்து கொடுக்கப்படுகிறது.ஏனெனில் தேன் மருந்துடனே தானும் மருந்தாகி வேலை செய்யும்.தேனில் பல சத்துக்கள் நிரம்பியுள்ளன.

                         தேன்,நோயை எதிர்க்கும் சக்தியையும்,நோய் வராமல் காப்பாற்றும் சக்தியையும் தருகிறது.தேன் கால வெப்பநிலைக்கு ஏற்றவாறும் .அந்தந்த இடத்தின் சூழ்நிலைக்குத் தக்கவாறும் கிடைக்கின்றது.பலவகையான தேன் இருந்தாலும் கொம்புத்தேன் எல்லாவற்றிலும் சிறந்தது.வாத நோய்,கொழுப்புச்சத்து ,இரத்த அழுத்த நோய் போன்ற நோய்களையுடையவர்கள் தேனை உட்கொள்ளலாம்.தேனைத் தண்ணீரில் கலந்து அருந்தினால் சிறுநீர் பெருகும்.தாது பலத்தை அதிகரிக்கச்செய்யும்.விஷம் உண்டவர்களுக்கு தேனுடன் நீர் கலந்து கொடுத்தால்,விஷத்தின் கொடுமை குறைந்து அத்தீங்கிலிருந்து அவர்களைக் காப்பாற்ற முடியும்.

                   உடல் எடை குறைய வேண்டும் என்று எண்ணுகின்றவர்கள்,தேனுடன் எலுமிச்சம்பழம் கலந்து பல மாதங்களாக உட்கொண்டால் உடல் எடை குறையும்.

                         தேனைப் பலர் மருந்துகள்,மூலிகைச் சாற்றுடன் கலந்து உபயோகிக்கின்றார்கள்.தேன் பல நாட்கள் ஆனதும் உறைந்து கற்கண்டாக மாறிவிடும்.இந்தக் கற்கண்டு ,தேனின் கற்கண்டை உட்கொண்டால் பாடுபவர்களுடைய குரலோசை இனிமையாக அமையும்.இசைப் பாட்டுக்குரிய குரலொலியை தேன் நல்ல முறையில் அமைக்கும்.இஞ்சிச் சாற்றுடன் தேன் கலந்து உட்கொண்டால் வாயு குணமாகும்.துளசிச் சாற்றுடன் தேன் கலந்து சாப்பிட்டால் சளி,இருமல்,கிருமி போன்றவை குறையும்.தேனும் சுண்ணாம்பும் கலந்து கட்டிகளின் மேல் தடவினால் கட்டி உடையும்.தீப்பட்ட புண்களுக்கு தேனைத் தடவினால் புண் குணமாகும்.தேனின் மகிமையை அறிந்து கொள்ளுங்கள்.நோயற்ற வாழ்வைப் பெற்றிடுங்கள் .

Read More

கோயில்களும் இன்றைய மக்களின் போக்குகளும்.I

               அன்று தொட்டு இன்று வரை கோயில்கள் என்றால் புனிதத்தன்மை வாய்ந்த ஒரு இடமாகத்தான் எல்லோராலும் போற்றப்பட்டு வருகின்றமை எல்லோரும் அறிந்ததே.ஆனால் இன்றைய நிலையில் அது சாத்தியமானதா என்பது கொஞ்சம் சந்தேகத்திற்கிடமாகத்தான் இருக்கின்றது.எல்லாக் கோயில்களையும் அப்படிக் கூறவில்லை.ஒரு சில கோயில்களில் அத்தகைய நிலை காணப்படுவது மறுக்கப்படவோ மறைக்கப்படவோ முடியாது என்பது உண்மை.இங்கு நான் கோயில்களை சுட்டிக் காட்ட விரும்பவில்லை.தேவையான சந்தர்ப்பத்தில் அதைச் சுட்டிக் காட்டக்கூட தயங்க மாட்டேன்.ஆனால் இப்போது அது தேவையில்லை என நினைக்கிறேன்.இங்கு நான் கூறப்போகின்ற விடயங்கள் நீண்ட காலமாக என் மனதில் தாக்கத்தை ஏற்படுத்திக் கொண்டிருந்த சில நிகழ்வுகள். 

          முதலாவது,கோயிலுக்கு சென்று வணக்கத்தகுந்தவர்கள் யார் என்ற கேள்விக்கு பதில் தர வேண்டுமென்றால்.கோயில் என்பது எல்லோருக்கும் பொதுவான இடம் ஜாதி மத பேதமின்றி எல்லோரும் சென்று வழிபடலாம்.(தீட்டு உள்ளவர்களை தவிர) என்று கூறுவீர்கள்.ஆனால் நான் பார்த்த ஒரு கோயிலில் குறிப்பிட்ட சிலர் எப்போது பார்த்தாலும் கோயிலுக்கு உள்ளே வந்து வழிபட மாட்டாங்க வெளியிலேயே நிற்பாங்க.அப்போ ஊர் பெரியவங்க கிட்ட நான் கேட்டேன் ஏன் அவங்க அங்கேயே நிற்கிறாங்க என்று.குறைஞ்ச ஜாதிக்காரர் கோயிலுக்குள்ள வரக்கூடாது என்பது அவங்க ஊர் கட்டுப்பாடாம்.அப்போ நான் சின்னப் பொண்ணு என்றதால அப்படிக் கூறி சமாளிச்சிட்டாங்க.நானும் விட்டுட்டன்.

          அதே கேள்வியை நான் இப்போ கேட்டதுக்கு அதே பதிலைத்தான் சொன்னாங்க.நானும் கேள்வி கேட்டு அவங்ககூட வாதாடினேன்.அவர்களும் சமாளிப்பதற்கு ஏதேதோ காரணங்கள் சொன்னாங்க.இறுதியில் சொன்னாங்க  அது அந்தக்கால பெரியவங்க கட்டுப்பாடு போட்டாங்க நாம ஒன்றும் செய்ய முடியல என்று.நான் கேட்டேன் இப்போ நீங்கதானே பெரியவங்க நீங்க இந்த காலத்துக்கு ஏற்ப கட்டுப்பாட்டை மாற்றலாம்தானே என்று.இப்போ அவங்க வரவேணாம் என்று நாங்க சொல்லலைதானே வேணுமென்றால் அவங்க உள்ளே வரலாம்தானே என்றாங்க.அதை என்கிட்ட சொல்லி என்ன ஆவது?அவங்ககிட்ட சொன்னால் அவங்க உள்ளே வருவாங்கதானே.இவங்க மனசில தோன்றத அவங்க என்ன மையா போட்டு பார்க்கிறது?

         கடவுள் வந்து சொல்லிச்சா மேல் ஜாதிக்காரர்கள் மட்டும்தான் கோயிலுக்குள்ள வந்து என்னை கும்பிடனும் மற்றவங்க எல்லோரும் வெளியில நின்றுதான் கும்பிடனும் என்று.நீங்களா ஒரு சட்டம் போடுவீங்க அதுக்கு ஒரு சமாளிப்புக் கதை வேற.தங்களது குறிப்பிட்ட சில தேவைகளுக்கு மட்டும் அவர்களை பிரித்து வைக்கப்பட்ட கீழ் ஜாதிக்காரர்களது உதவி வேணும்.அப்பிடி என்றால் அந்த தேவைகளுக்கும் அவர்களை நாடாமல் தாங்களே தங்கள் தேவைகளை நிறைவேற்றிக் கொள்ள வேண்டியதுதானே?அது அவங்க கௌரவப் பிரச்சனை.ஏன்னா அவங்கதான் உயர்ந்த ஜாதிக்காரர்களாச்சே.எப்படி அவங்க அதெல்லாம் பண்ணுவாங்க? 

       இப்படிப்பட்ட சமூகம் ஒன்றில் தானாக உணர்ந்து திருந்திக் கொள்ளணும்.அதில் எனக்கு நம்பிக்கை இல்லை.இல்லையேல் யாராவது இதனை அவர்களுக்கு உணர வைக்கணும்.மேல் ஜாதிக்காரர்களுக்கு ஒரு கடவுள் கீழ் ஜாதிக்காரர்களுக்கு வேறு கடவுளா?மனசிலே இவ்வளவு அழுக்குகளை வைத்துக்கொண்டு தாங்கள் மேல் ஜாதின்னு சொல்லிக்கொண்டு திரிகிறவர்களே கோயிலுக்கு உள்ளே போகலாம் என்றால் அவங்களால் கீழ் ஜாதின்னு ஒதுக்கி வைத்திருப்பவர்கள் உள்ளே சென்று வழிபடுவதை ஏன் தடுக்கணும்?இதை நாம சொல்லப்போனா திமிர்ல பேசுறா,பெரியவங்கள எதிர்த்து பேசுறா என்றெல்லாம் பெயர்.

அப்போ பூனைக்கு மணி கட்டப் போறது யார்...........?

கவனத்திற்கு:-

யாரையும் கேவலப்படுத்துவதோ,யார் மனதையும் புண்படுத்துவதோ என் எண்ணம் இல்லை என்பதை முதலில் புரிந்து கொள்ள வேண்டும்.

தொடரும்....

Read More

மறக்க முடியவில்லை...

காதலின் நம் பாதச்சுவடுகள்

அழியாத வரலாறென்று

மனம் மகிழ்ந்திருந்தேனே

அத்தனையும் பொய்யாகி

கண்ணீர் காயங்கள்

சுவடுகளாகிப் போய்விட்டனவே

இன்று இருவரும்

இரு வேறு துருவங்களாய்

என்னவாயிற்று நமக்குள்....?

மனசொடிய கடுஞ்சொல்

அணுகுமுறையில் கொஞ்சம் வெறுப்பு

விளையாட்டுக்காகவேனும்

உன் மேல் காட்டியதில்லையே

உன்னால் மட்டும்

எப்படி முடிந்தது...?

உண்மைக் காதலுக்கு

நீ காட்டியது

சோதனைகளையும் வேதனைகளையும்

உன் பொய் வார்த்தைகளில்

நம்பி ஏமாந்தது

நான் மட்டுமல்ல....

உன்னை மறந்து நெடுநாளாயிற்று

உன்னால் மனம் பட்ட

காயத்தை மட்டும்

மறக்க முடியவில்லை

நீ செய்த குற்றங்களுக்கு

தண்டனை பெறுவது

என் கண்களும், இதயமுமா....

கண்களைத் தண்டித்தேன்

உன் உருவை மறைத்து விட்டது

இதயம் மட்டும்

ஏனோ அடம்பிடிக்கின்றதே

தனிமையே பிடிக்காதவளுக்கு

இப்போதெல்லாம் எஞ்சியிருப்பது

தனிமையும் வெறுமையுமே......

Read More

வெற்றியை நோக்கி.........

உறக்கத்தில் கூட - என் 

தோல்வியின் ஞாபகங்கள்  விடவேயில்லை

தட்டி எழுப்பி 

சோகக்கதை கூறி அழ வைத்தது

வெளிப்பூச்சிற்காய் 

தோல்வியை  மறைத்தாலும்

என்னுள்ளே 

தோல்வியை மறக்கவே முடியவில்லை.

தோல்விக்கு நானே காரணம்

என் கவலைக்கு நானே காரணம் 

வென்றவனை எடை போட 

மறந்ததே காரணம் 

அடி விழுந்தது உண்மை

இனி விடப் போவதில்லை 

தோல்வியே - எனது

வெற்றியின் முதற்படி 

உறக்கத்தில் ஆழ்ந்திருந்தேன் 

உறைக்கவே எழுந்து விட்டேன் 

இதோ.......

வெற்றி என்னை நோக்கி 

கரம் கூப்பி அழைக்கின்றது.......

 

Read More

உனக்கான என் தேடல்

நடு நிசியின் நிசப்தத்தில் 

இருளை வெறித்தபடி

உறங்காதிருக்கும் என்

விழிகள் இரண்டிலும்

உன்னைப் பற்றிய நினைவுகள் 

ஏக்கங்களின் மொத்த உருவமாய்.

ஒன்றாய் கூடி மகிழ்ந்திருந்த 

அந்த நாட்களில்

நாம் நினைத்ததில்லையே 

இப்படி ஓர் பிரிவை .

விதியின் விளையாட்டா- இல்லை 

உறவுகளின் சதியா.

அன்றேல் 

உண்மை நேசத்திற்கு

கிடைத்த வெகுமதியா.

சிட்டுக் குருவியாய்

அன்று பாடித்திரிந்த அந்த நாட்கள்

இன்னும் நெஞ்சில்  ஈரமாய்.

பிரிவை நினைத்து 

கண்ணீரில் கரைந்த

இறுதி நாள்.

பசுமையான நினைவுகளை

கொஞ்சம் மீட்டிப் பார்க்கின்றேன்

கண்ணீர் துளிர்க்கின்றது.

கூடவே காற்றலையில் 

எங்கோ ஒலிக்கின்றது 

வைரமுத்துவின் வைர வரிகள்.

உன்னோடு நானிருந்த 

ஒவ்வொரு மணித்துளியும்

மரணப் படுக்கையிலும் 

மறக்காது கண்மணியே.

நெஞ்சில் ஏதோ நெருடல்

கண்ணில் ஏதோ ஓர் கலக்கம்.

தூக்கமின்றி விடிகிறது

மீண்டும் ஓர் அதிகாலை.

 
 

Read More

நம்பிக்கையால்........................!

உடலின் வலியின் மத்தியிலும் 

வானம்பாடியாய் 

சிறகினை விரிக்கத்தான் நினைக்கின்றேன்

முடியாமல்..........

சுமைகள் சிறகினை உடைக்கின்றன

விண்மீனாய்

கண் சிமிட்டத்தான் முனைகின்றேன்

கண்கள் இருட்டினுள் 

தொலைந்து போகின்றன 

இதழைப் பிரித்து

புன்னகைக்கவும் முடியவில்லை 

மனதின் காயங்கள் 

மேலும் ரணமாகிப் போவதால்............

இத்தனையும் தாண்டியிங்கு 

வாழத்தான் நினைக்கின்றேன்!

வாழ்வின் ஓர் ஓரத்தில் 

மனதில் புதைந்து போகும் 

எதிர்பார்ப்புகள்

நிஜமாகும் என்னும்

நம்பிக்கையினால்........

 

Read More